Vai al contenuto principale

Impresis di îr, siums di doman -

Un program pensat par contâ la storie di chei imprenditôrs e di chês impresis che an vût sucès, fasint cognossi il Friûl tal mont. Un viaç traviers oms e feminis che scomençant di un sium, an cjatât le strade juste, la idee vincent, promovint lavôr, fortune e sperancis. Un program de sede Rai dal Friûl Vignesie Julie, di e cun David Zanirato par cure di Arianna Zani

Lista episodi

10 Ago 2024

Remigio Solari

Un om caustic, risiervât, dedicât al lavôr, scherçant soredut cun chei che a lavoravin cun lui. Remigio Solari al nas a Pesariis ai 29 di Març dal 1890, dissendent di chei Solari che a àn trasmetût la art di fâ orlois par gjenerazions, fintremai dal 1600. A 11 agns, dopo di vê frecuentât la cuinte classe, al scomence a lavorâ "ta faria": la fabriche di orlois Solari a Pesariis. Po dopo, daspò de lauree in inzegnarie eletriche, si trasferìs a Udin. Cognossût pe invenzion dal "Tabelon Solari", un sisteme di ore e di segnalazion di rivadis/partencis pes stazions feroviariis e pai aeropuarts. Introdusût tai agns sessante dal 1900, il scheme al dopre un mecanisim eletromecanic che al à rivoluzionât la comunicazion publiche, miorant la leibilitât e la afidabilitât des informazions. Il sisteme al è deventât un icone dal dissen e de funzionalitât industriâl, contribuint in mût significatîf ae organizazion e ae gjestion dal trafic di passizîrs a nivel globâl.
23 min
03 Ago 2024

Luigi Moretti

Nassût tal 1823, a Gnespolêt di Listize, intun Friûl che al faseve part dal Imperi asburgjic, fi di marcjadants, al tache a lâ a vore tal cumierç dal forment, dai spirts e dai gjenars alimentârs, cun grant sfuarç. Luigi Moretti tal 1859, fuart de esperience madurade in chescj setôrs, al fonde a Udin une fabriche sul stamp di chês che bielzà a vevin viert in Austrie, paîs dulà che al jere lât a procurâsi no dome i machinaris ma ancje la manoalance. Si clamave Fabriche di bire e glaç. La prime butilie si vent tal 1860, intun periodi dulà che la produzion e il consum in Italie a jerin inmò modescj. Benvolût dai siei dipendents, stimât in citât, Moretti al mûr zovin, tal 1875 ma la aziende che al veve ideât e à continuât a prosperâ e dâ lustri a dut il Friûl in gracie dai fîs Luigi e Giuseppe e po dopo i eredis, tra cui Lao Menazzi Moretti e Luigi Menazzi Moretti, lassant un segn indelebil te memorie di ducj i furlans e no dome.
26 min
27 Lug 2024

Arturo Malignani

Nassût a Udin, ai 4 di Marc dal 1865, fi di Giuseppe, fotograf e pitôr e di Carolina Ruggeri, Arturo Malignani al gafe dal pari i stimui pai prins esperiments chimics e otics. Cuant che lui al mûr, e je la sûr Adele a deventâ il so pont di riferiment, in agns dulà che in Italie e in Europe a si tache a usâ la energjie eletriche. Arturo al scomence a sperimentâ, studiant prime a Padue e daspò a Milan, duncje tal 1884, al presente a un pâr di udinês tra i plui iluminâts, la so gnôve lampade a incandessence, che a emanave une lûs blancje cul dopli de intensitât e cuntune durade di dôs voltis di plui di ce che a si podeve vê al timp; dome cuatri agns prime e jerin stadis lis lûs di Thomas Alfa Edison a iluminâ la citât di New York. La sô ossession e devente chê di fâ simpri di miôr; par chest tal laboratori di cjase, al perfezione un procediment dut gnûf, e al fonde, chê che in dì di vuê o definiressin une start-up, e nas cussì la Arturo Malignani & Co. che e produsarà lampadis, acumuladôrs, motôrs eletrics, dinamo e altris brevets. In pôc timp al posizione e al gjestìs 1679 lampadinis, tra publichis e privadis, dant lavôr a 45 operaris. Udin, dopo Londre e Milan, e devente la tierce citât di Europe completementri iluminade cuntun sisteme eletric.
26 min
28 Lug 2024

Jacopo Linussio

In cheste seconde pontade di Impresis di îr, siums di doman fevelarìn di Jacopo Linussio, nassût a Paulâr, tal borc di Vile di Mieç, tal 1691. Dopo vê fat il garzon a Vilac, in Carinzie, par imparâ il todesc e la art de tiessidure, al torne in Cjargne, a Tumieç, dulà che al lavore come garzon. Tal 1717 si met in propri, trasformant la cjase paterne dal abât di Mueç intune buteghe. Tal 1739 al tache la costruzion de Fabrica, un stabiliment inmaneât dongje de sô vile, Palaç Linussio, pensade dal architet Domenico Schiavi. Planc planc la sô idee di imprese e si slargje cun gnovis filandis a Mueç e San Vît dal Tiliment. La sô gjenialitât, a nivel european, e je stade chê di concepî il lavôr in cjase pes feminis, ce che al dì di vuê o clamìn smart working. Si inacuarz di lui la Serenissime Republiche di Vignesie. Cu la fuarce de aghe dai riui al tache a fâ movi i prins telârs mecanichis. Sot di lui e son rivadis a lavorâ fintremai trê mil personis, numars che par chei timps a erin enormis. Lis stofis di Linussio a vignaran espuartadis in dut il mâr Mediterani…. A contâ cheste storie di altris timps, a nus judaran Sandri Di Suald, storic dal Friûl, scritôr, creatîf, fumetis e Gilberto Ganzer, storic e critic di art.
25 min
06 Lug 2024

Apollo Prometeo Candoni

In cheste prime pontade o larìn a rivivi la epopee di Apollo Prometeo Candoni, nassût a Damâr, in Cjargne, ai 24 di Avost dal 1911 da Umberto e Maria Monai. Un zovin cressût in timps complicâts che, dopo jessi emigrât in France, di vuarp, al è rivât a imagjinâ, inventâ e daspò realizâ i ferâi pes machinis. Po dopo, cun Costantin Lovstoff dit Constant, cognossût durant le seconde vuere mondiâl, al è rivât a comprâ tal 1947 un belancîr manuâl e une cisore par muarsets, instalâts tal garage dal ristorant che al gjestive cun le femine te perifarie di Parîs. Cussì e je nassude la Seima, un embrion di industrie che, vincj agns dopo, e podeve fâsi fuarce cun trê stabiliments, ducj in France, prime di sbarcjâ in Italie, in chê Cjargne di dulà che Candoni al jere partît di frut.
27 min